" PARI "

Jee Rahi Thi Akeli Magar Ek Din 

Dekha Apne Hi Jaisa Akela Koi 

Bandh Tha Woh Khamoshi Ki Zindaan Me 

Jis Mein Darr Tha Na Tha Koi Rauzan Khula, 

Jee Me Aaya Ke Uski Yeh Tanhaiyan 

Baant Kar Shaad-O-Abaad Kar Doun Usse, 

Usse Boli, "Mera Haath Thamoge Tum?" 

Woh Meri Baat Par Soch Me Pad Gaya, 

Apne Maazi Ka Darr Phir Kya Mujhpe Waa 

Uska Maazi Ke Jis Par Kayi Daag The, 

Woh Yeh Samjha Ke Uske Andheroun Ka Dar, 

Phir Badal Dega Mere Irade Magar 

Wo Irade Zyada Atal Ho Gaye, 

Bas To Khud Ko Supurd-E-Hawa Kar Diya 

Thaam Kar Haath Mera Wo Udne Laga, 

Khawab Se Khawab Sa Koi Judne Laga, 

Zindagi Ke Suhane Se Pal Ho Gaye, 

WaQt Kaise Gaya Kuch Khabar Na Hui, 

Ek Din Maine Usse Kaha Is Tarah 

"Ye TalluQ, Ye Ehsaas Apni Jagah 

Par Mujhe Ab Tum Apne Liye Maang Lo 

Mujhko Apna Bana Lo Sada Ke Liye" 

Sunke Ye Baat Meri Woh Chup Ho Gaya 

Jaane Kis Soch Me Is Qadar Kho Gaya, 

Uski Khamoshiyan Ne Dikhaya Magar, 

Bebasi Uski, Lachariyoun Ka Nagar, 

Aur Mein Apni Majbooriyoun Ka Jahan, 

Chaha Kar Bhi Na Kar Paayi Uspe Ayyaan 

, 

Kis Tarah Usse Kehti Ye Mein  " HOON PARI"

Umar Bhar Yun " PARI " Banke Reh Jaye Toh

 

Dolti Hai Nazar Uspe Har Dev Ki, 

Aur Nazar Woh Ke Aisi Hai Jis Ki Tapish, 

Saara Jeevan " PARI" Ka Jala Kar Tale, 

Uski Khushiyoun Ki Aur Raahatoun Ki Jagah, 

Likh De Uske MuQaddar Mein Tanhaiyan", 

Main Ke Tanhaiyon Ki Satayi Hui, 

Phir Se Yun Umr Bhar Ki Ye Tanhaiyan, 

Kis Tarah Mol Le Loon, Tum Hi Ab Kaho? 

Aur Phir Yun Hua, Mujhko Chunna Pada 

Umr Ki Reh-Guzar Ke Liye Humsafar 

Har " PARI " Ki Tarha Se Mujhe Bhi Yunhi 

Banke Ladki Piya Sang Jaana Pada, 

Maine Usse Phir Us Din Kuch Aise Kaha, 

Ke "Main Ab Kisi Aur Ke Naam Hoon" 

Ye Sun Ker WoH Chounka, "Woh IQraar-O-Ehd- E-Wafa, 

Kya Hue, Woh Mohabbat Kidhar Kho Gayi?" 

Main Ye Boli, "Daga Thi, Wo Sab Jhooth Tha, 

Mujhko Ulfat To Apne Piya Se Hai Bas" 

Kitna Hairan Hua Hoga Woh Sunkar Ise 

Dil Shikasta Hua Hoga Uska Magar, 

Main Hamesha Karoungi Khuda Se Dua........, 

Usko Jeevan Mein Aisa Mile Humsafar, 

Yaad Mujhko Kare Na Kabhi Bhool Kar, 

Uske Daaman Mein Bhar Jaye Itni Khushi, 

Usko Chhu Bhi Na Paaye Koi Gham Kabhi, 

Tha MuQaddar Mein Apne Yehi Kuch RaQam, 

Ke Mile Aur Mil Kar Bichhad Jaye Hum............